بسم الله الرحمن الرحين
السلام عليكم ورحمة الله وبركاته
ادري اني راح انجلد بس كلام يقرقع بقلبي ولازم اكتبه ولا اقعد اصفق او انتحر خخخخخخخ
من كم يوم وانا في باللي أكتب هالموضوع وهنا راح اكتب وبكل صراحه عن ليلة العمر او ليلة الدخله الله يعينكم
على سعود اذا كتب بصراحه قبل كم يوم قاعد اتكلم مع واحد خويي اعزوبي وجاب سيرة ليلة الدخله خصوصاً
انه ناوي يتزوج قريب وخايف من الارتباك والأخطاء اللي تصير بهالليله قعدنا نتكلم اتضح لي انه مو فاهم شي ومو
بس هو هذا حال اغلب الشباب اللي عرفتهم هذا من غير المتزوجين اللي اعرفهم وخبصوا بهالليله والبنات بعد حدث
ولا حرج .
علشان ستذا فكرت اكتب عن ليلة الدخله (ليلة العمر) وبيكون موضوعي منقسم لشقين شق للشواكيش ( الشباب ) الله
لا يحرمني منهم اللي مقبلين على زواج الله يتمم لهم بخير ان شاء الله والشق الثاني لحبيبات قلبي البنات الناعمات
ومافي مانع تطلعون على شقوق بعض ترا عادي .
نبدأ بالحبايب ابو الشباب يجمع طول عمره وما خلا احد يعرفه الا تسلف منه علشان يتزوج مهر وشبكه وتكاليف
عرس وام العروس تبي واخت العروس تبي وبنت شغالة ام العروس تبي ويكع هالضعيّف وحفلة خطوبه وحفلة
ملكه وحفلة خرجه وحفلة دخله وتجهيزات عرس والقصر الفلاني و وثياب جديده وبشت وشماغ وثوب نوم وملابس
داخليه (ملابسه القديمه كلها يحذفها) تسأله ليه يقولك ليلة العمر طيب الله يهنيك يابو الشباب وزفوا العريس وراح
ومن بكره تقابله عينه مورمه ورقبته لاعب فيها قطو وظهره يعوره
تقوله : سلامات يابو الشباب مبروك العرس .
يقولك : الله يبارك فيك .
تقوله : عسى ماشر وش فيك مرقع من كل مكان .
يقولك : تعرف دلع البنات (العروس كانت معصلجه !!!!) بس اخوك طلع رجال وسوى الواجب .
تقوله : وش سويت .
يقولك : بعد مارفستني بعيني طرت برا السرير وطحت على ظهري وحاولت امسكها وقطعت حلقي وانحاشت
وزبنت دورة المياه (وانتوا بكرامه) كسرت الباب عليها و سحبتها للسرير وربطتها فيه وحليت الواجب .
وابوه (من اخر المجلس) : كفو ولدي عاش الذيب رجال زي ابوك .
ليه يالحبيب داخل حلبة مصارعه هي ؟ رايح تهاوش انت ؟ مغتصب وحده الاخ ؟
ولا الثاني تسأله
تقوله : الف مبروك ها بشر كيف الزواج حلو ؟
يقولك : الله يبارك فيك اي حلو بس العروس صار معاها نزيف ووديتها للطبيب !!
طيب ليه ؟؟!! وش الاسباب ؟!! كيف نتلافى هالامور ؟؟! من اللي يعلمنا هالاشياء قبل نتزوج ؟ كيف أخلي
بنت الناس الشريفه اللي ماعمرها جربت هالشي (مابي اقول الجنس استحي) وتحبه وما تتعقد منه و تنام معاي
مرتاحه وتطلب هالشي مني (ماني قايل لا تحاولون) بدون خجل ؟
اول شي لازم كلنا نعرف ان الله سبحانه وتعالى خلق الخلق زوجين ذكر وأنثى لحكمه من رب العالمين كان يقدر
عز في علاه انه يخلق الخلق جنس واحد بس ويخليه يحمل ويجيب عيال بدون الجنس الثاني لكن رب العالمين
قال : ( وَمِنْ آيَاتِهِ أَنْ خَلَقَ لَكُمْ مِنْ أَنفُسِكُمْ أَزْوَاجًا لِتَسْكُنُوا إِلَيْهَا وَجَعَلَ بَيْنَكُمْ مَوَدَّةً وَرَحْمَةً ) [الروم: 2] سبحانك
ياربي خلق الذكر والانثى وجعل بين الازواج موده ورحمه خلقهم رحمه لبعض ولازم نعرف ان الله سبحانه جعل
الممارسه الجنسيه من الذ المتع في الحياه للذكر والانثى يعني عند الرجال وعند الحرمه يعني زيه زي متعة الاكل
لكن بالحلال ماراح تعرف متعة الجنس الحقيقه الا بالحلال وبشروط وتعليمات ومن أهم الشروط البدايه الصح
اللي هي ليلة الدخله مطلوب منك تبدأ صح ماتعرفون وش كثر هذيك الليله يكون فيها توتر والتوتر عند ابو الشباب
وعند ام الشباب طيب وش نسوي ؟
ثمانين بالميه من العمل بيكون على ابو الشباب لان ام الشباب بيكون ذابحها الحياء والخوف الا من رحم ربي
اول شي يابو الشباب من ضمن اشيائك اللي تجهزها للعرس وقبل تشتري العطور (اهم شي عندي العطور) رح
للصيدليه وقله ابي اكريم تسهيل عملية الايلاج (ادري مافهمتوا شي قله k.y وهو راح يفهم) الكريم هذا مهم جداً
وممكن جدا انه ينقذك من اسبوع بعد العرس تكون فيه محروم من العروس وهي محرومه منك وبشرح مبسط علشان
ماحد يزعل مني لو كان عندك خاتم ضيق وتبي تشلحه ولا تلبسه مو تحط كريم ولا صابون ولا ماده لزجه اعتبر
الكريم هذا هو الماده اللزجه لانك من غيره راح تجرح وتخرب وتسبب بلاوي تمنعك وتمنعها من المتعه طيب
اشتريت الكريم غيره ؟ (لا تنساه ترا بتتورط وبتاخذ اي كريم من جهاز العروس ويسبب لك تسلخات انت وهي)
الشي الثاني اعتبر ام الشباب واحد من خوياك توك متعرف عليه يعني لا تدخل من الباب وانت شايل همك على
كتفك وتبي تخلص المهمه ترا مهي بطايره تراها صارت حلالك وانت حلالها هد شوي لا تصير مفجوع سولف خذ
وأعط اكتب على يدك كم نكته (قسم ان ما كتبت على يدك غير تنساها) قلها ابي اشوف القمر وارفع الطرحه عن
وجهها لانها اكيد راح تموت من الحر بس مستحيه تقولك ارفعها روق الجو تعرف قل الاشياء المكبوته داخلك
قلها وش ذا الزين , حلوه التسريحه , ما شاء الله حلوه الرموش الاصطناعيه بتقولك لا مي اصطناعيه قل ما شاء
الله هذي رموشك (اكذب ياخي حتى لو ماعندها رموش) في شي حلو ويلطف الجو بقوه بعد قلها انا ابي اصلي
ركعتين قومي توضي علشان تصلين معي (خطه ناجحه ميه بالميه) اول شي تعطيك فرصه تغير وتلبس ثوب النوم
غير تسذا هي راح تضطر انها تشيل كرتون البكل اللي براسها ومثبته فيها التسريحه وغصب عنها تغير ثوب
العروس طبعا تحتاج تشجيع منك قلها انا ابي اروح اتوضاء قبلك وانتي غيري علشان تتوضين (تلميح) راح ترجع
تلقاها صارت وحده ثانيه بس مشي حالك خلاص تدبست وارضى بالمقسوم (يعني انتبه ترجع وتلقى وحده ثانيه
بالغرفه وتقولها وين ام الشباب ترا هي نفسها بس تلقها شالت البلاوي) وتلقاها لبست ثوب مايبين منها نتفه ولا
قميص نوم بس فوقه روب مربوط ربطه ابن امه يفكها خلها تروح تتوضى ولا تقبل اي عذر مناكير مدري ايش
كله جايز يجوز الوضو ماعليتس تيممي عادي (قلها الفتوى هذي من صعفق) طبعا بتصلون ركعتين تكتشف فيها
انك نسيت القرآن كله ماعليه مش حالك وقل الحمد الله بس بعد الصلاه ان كان في عشاء تعشوا ولا تنسى تأكلها
غصب لان صدقني راح تكون ام الشباب ميته من الجوع وصارلها من الصبح ما كلت اذا مره خلها تشرب العصير
بعدها سولف عن نفسك وش تحب وش تكره خلها تتكلم وتعبر اعرف من هي ام الشباب وش تفكيرها وكل ما سكتت
اسالها ولا تكلم انت ولا تنسى تتميلح وتنكت بنص السوالف قلها انتي الحين زوجتي حلالي وانا زوجتس حلالتس
يعني لا تستحين مني ولا بستحي منتس ترا انا اشخر وانا نايم (يعني لف الموضوع لا تكمل للهدف) وعن بنات
هالايام دخلها بالسوالف بالالعاب ولا بالماركات راح تستبسل بالسوالف المهم انك تمرر تشيل منها الخوف والتوتر
وقبلها شيل توترك انت اسالها وش عندها العاب بجوالها تعرف تلعب بلايستيشن ؟ اي شي يخليها تفهم انك قريب
منها مو وحش يبي يفترسها افهم انها تبي تدخل عندك وعندها تصور انها رايحه للموت اليوم ولازم تقاوم بكل
الطرق انت بعد ما تشيل التوتر وتكسر الحاجز النفسي اللي بينكم (لاحد يقولي وش معنى حاجز نفسي وربي سمعتهم
يقولونه) حاول تكلمها عن الجنس انه شي طبيعي بين الازواج وانه متعة الحياه الزوجيه اذا قدرت تعرف
منها رايها تمام عليك ما تكلمت مو مشكله بس وصلها انه هذا الشي صاير صاير اليوم بكره بعد اسبوع متى ما
صارت هي مستعده ولازم بموافقتها وانه هذا الشي راح يخليك تحبها اكثر ويقربكم من بعض ويكمل حياتكم وبس
وغير الموضوع وخذ راحتك باي مواضيع ثانيه ومتى ما طاب خاطركم من السوالف قلها اكيد انك تعبانه وانا تعبان
(اكيد انتوا الاثنين مواصلين من يومين) يالله نروح ننام وافهمي اني ماراح اقرب لتس الا برضاتس بس خلينا
نتدرج اليوم نقضيها بوس واحضان ومتى ما كنتي مستعده يصير الباقي .
مهم جدا ما تحاول تبدا بالعمليه الجنسيه مباشره لان ام الشباب راح تكون كل عضلاتها منقبضه وهذا شي طبيعي
مع الخوف والرهبه والحياء البوس والاحضان والمداعبه وللعب بالشعر ولمس الجسم ورضاعة ...... والبوسه
الفرنسيه (لاحد يقولي مايعرفها) كلها اشياء تخلي ام الشباب اتدوخ وتنسى الخوف (اللي امه داعية له راح يلاقي
سوائل طبيعيه ومايحتاج الكريم) لكن بالغالب راح تستخدم الكريم وكل ماطولت في عملية المداعبه كان افضل لان
ام الشباب راح تكون مستعده للي راح يصير , دورك ينتهي بعد عملية الايلاج متى ماتأكدت من الدخول الكامل
وشفت قطرات الدم البسيطه بوس ام الشباب على جبينها وصرف عمرك (الا في حالة ان ام الشباب ضلت دايخه
ومتمسكه فيك وماعرفت وش صار تكون محظوظ ما شاء الله عليك كمل ولا تكرر ولا تروح
تشتري فياقرا وتسوي فيها الفارس المغوار مو وقته يابو الشباب) بعدها رح لاي مكان واترك
ام الشباب تلملم نفسها ولا تحرجها توقف على راسها خلها تستعد لك افضل شي انكم تنامون بعدها بحضن بعض
ولا تحاول تسوي شي قبل مرور اربع ساعات على الاقل لانه عباره عن غشاء رقيق انجرح عطه فرصه يلتم واذا
صبرت لليوم الثاني تكون احسن واحد , هذي النصائح لو طبقتها بحذفيرها راح تخلي ام الشباب قبل كل شي تحترمك
لانك قدرت وضعها وتحبك لانك كنت حنون عليها وتعشقك لانها جربت معاك الذ متعه خلقها الله بطريقه ما ضرتها
بالعكس تحول الجنس من شي كانت هي خايفه منه الى شي تحبه معك وصدقني مهما صار ماراح تحبه غير معك لانك
كنت اول رجال يوصلها هالاحساس اللي ماعمرها حسته .
-------
نجي لام الشباب ماراح اعيد شي من اللي كتبته لابو الشباب لانتس اكيد قريتيه هو عليه ثمانين بالميه صح بس
بعد انتي عليتس عشرين ومهمه , كلنا نعرف ان البنت من يوم هي صغيره وهي تحلم بليلة العمر مع ابو الشباب
الفارس اللي راكب افخم سياره بيضاء (حصان ابيض كان زمان الحين لازم غني) يسويلها احسن عرس بالعالم
تحلم بكل التفاصيل بالفستان والطرحه والمسكه والورد والبوفيه والتسريحه والمكياج والجهاز ويوم يتحقق الحلم
يجي ابو الشباب على ونيت ابيض وتوافق ويسحبونه اهلها على وجهه من كثر الطلبات وتجهز كل اللي حلمت
فيه وتسوي اشياء اول مره تسويها (حلاوه ونتف وتشقير وبلاوي) وسهر وتعب وكريمات وتقشير ونفخ و سلخ
و أحلا زفه واحلا تجهيز وتشتري قمصان النوم وملابس الاغراء (يعني قاعده تجهز) طيب كل هذا ليه ؟!!
علشان ليلة العمر وأخرتها تجيها فلانه اللي ماتستحي تمسك ام الشباب على جنب
وتقولها : انتبهي لا تخلينه يلمستس !!!
والثانيه تقولها : لا تخلينه يقربلتس !!!
الثالثه تقول : الله يعينتس على اللي راح تشوفينه !!!!
الرابعه : مسكينه راح يعورتس كثير !!!
الخامسه : حاولي تقاومينه على قد ماتقدرين الله يكون بعونتس يوجع زي المسامير!!!
السادسه : اذا قربلتس اسطريه على وجهه !
لييييييه حرام عليكم كل وحده تعطيها من تجربتها هي اللي كانت زي وجهها واذا سألتهم تلقاهم كلهم متزوجات
وعندهم 17 ولد طيب مدام هو (ماني قايل الجنس) فلم رعب طيب ليه مستمرات مع ازواجكن ليه اذا قعد زوج
الوحده منهن اسبوع ما نام معاها تنهبل وتسويله اللي يبغاه وتحاول تراضيه ؟؟!!!! وين راح فلم الرعب اللي
تحذرون منه ؟ اسمعي حبيبتي ام الشباب ماعليتس من سوالفهم ماراح اقولتس انه ما في وجع بس الوجع هذا
يتفاوت بين شكة دبوس وبين الام مبرحه على اي اساس يكون شكة دبوس ومتى يكون الام مبرحه هذا يعتمد على
مدى انسجامتس مع اللي يسويه ابو الشباب بهذيك الليله يعني عطيه فرصته يهدي اعصابتس حاولي تتجاوبين
معاه خلي غريزتس الطبيعيه تقودتس اعرفي ان هذي الليله مفتاحتس للسعاده الزوجيه اللي راح تتمتعين فيها
طول عمرتس وتحسدتس عليها كل البنات بهذي الليله اما تكسبين حبيب ولا انتس تخسرينه حاولي تتغلبين على
خجلتس وافهمي ان هذا اللي معاتس بالغرفه هو حلالتس وانتي حلاله حاولي تستمتعين بحلالتس وخليه يشوف
الدلع والحنان والانوثه اللي عندتس واللي صارت له من اليوم اسحريه بحركاتس خليه يعرف انه ماعاش قبل
هالليله ولا راح يلقا مثلتس ابد وافهمي (ان كيدهن عظيم) اكسبي خاتم بيدتس وعشيق يحبتس باختصار صيري
الملكه وتوجي حالتس في قلب هالمسكين .
وبس تعبت وانا اكتب اتمنى لكم حياه سعيده واطلب منكم عدم الرد على الموضوع لعدم احراج اي طرف
ولا تنسوني من صالح دعائكم .
بقلم اخوكم صعفق الفايز